ملف شامل عن الكونسيلر
مرحبا
اليوم بنتكلم عن الكونسيلر بصفه عامه ،،، والكونسيلر للهالات السوداء تحت العيون بصفه خاصه ،،،
اخترت هالموضوع لأن كثير منا يستخدم الكونسيلر غلط ،،، (غالبا اللون ما يناسب البشره ويلفت النظر للمشكله بدل لا يحلها)
شي ثاني أغلبنا نركز على مكياج العين والاي شدو والاي لاينر ورسمات العين و الرموش ،،، وهذا شي حلو وكلنا نحرص عليه ،،،بس لو ماكانت منطقة تحت العين موحدة اللون ومشرقه كل هالتعب بالمكياج بيروح عالفاضي لأن الهالات بتخلي الشكل النهائي مو بروفيشينال أبد،،، فـلازم نتقن هالنقطه عشان نقدر نبدّع بالباقي
الكونسيلر هو خافي العيوب طبعا ونستخدمه عشان نخفي اثار حبوب ،،، مناطق لونها مختلف عن لون باقي الويه ،،، و الهالات السوداء تحت العين طبعا ،،،
المشكله عندنا هو ان طبيعة بشرتنا مختلفه كل الاختلاف عن بشرات الأوروبيات والأجنبيات عموما ،،،
و المشكله إن أغلب المنتجات الموجوده في السوق تحاكي حاجاتهم اهم مو احنا ،،،
هذا ما يمنع إن بعض ماركات الميك اب المتخصصه وفرت لنا الحلول الملائمه ،،،
لكننا (وأنا أولكم) نغتر كثير (وينلعب علينا بسرعه) ونحب نسمع ان عالمستحضر حقق مبيعات خياليه ،،، وانه المستحضر الأول في أمريكا والخ الخ الخ
ولما نسمع هالكلام نقول لقينا الحل السحري لمشكلتنا
مع ان هالحل مو شرط يناسبنا للأسف
نخش في الموضوع
بالنسبه للكونسيلر ،،، أغلب الحريم يعانون من عدم توحد لون الجلد ،،، وأغلبهم يعانون من الهالات السوداء ،،،
فـوجدت في السوق مستحضرات لا تعد لعلاج هالمشكله ،،،
هدفنا اليوم نستعرض أهمها ،،،
وكيفية إستخدامها ،،،
بالاضافه لأفكار جديده تفيدكم إن شالله ،،،
عموما الكونسيلر له غرضين (مثل ما قلنا ،،، يا للويه ،،، يا للهالات) وبعض المستحضرات تتخصص فـ غرض واحد منهم ،،، وبعضها يمكن إستخدامه للغرضين ،،،
وهم فيه نوعين كونسيلر احنا وايد نخلط بينهم
فيه شي اسمه كونسيلر = خافي عيوب
وفيه شي اسمه كوريكتر = مصحح عيوب
في حالات معينه نحتـــــاج نستخدم المصحح قبل الكونسيلر العادي زي ما رح نشوف ان شالله ،،،
وهم ممكن نصنف الكونسيلرات كـ إخفاء بروفيشنال للعيوب ،،، أو كـ إضاءه لمنطقة تحت العين ،،،
خل نبدا ..
الصور لخبير تجميل كيم وهو يمكيجها وشوفو كيف البشره صافيه ،،،
أسئله شائعه بخصوص الكونسيلر
متى أحط الكونسيلر؟؟؟
أنا شخصيا أفضل احطه بعد الفاونديشن ،،، لأن ممكن بعض العيوب يخفيها الفاونديشن ويغنيني عن الكونسيلر ،،،
أو ممكن يقلل كمية الكونسيلر اللي باحتاج لها ،،،
~~~~~~~~~
أحط الكونسيلر بـ فرشه والا باصبعي والا بإيش بالضبط؟؟؟
الطريقه المثلى طبعا هي عن طريق فرشاة مخصصه للكونسيلر وخصوصا عند استخدام الكونسيلر لمنطقة تحت العين ،،، لأنها أدق وتدخل لأماكن أسهل من الإصبع ،،،
لكن على حسب بشرتج و نوعية الهالات السودا ،،، يعني اذا كانت الحاله متأزمه والسواد غامج استخدمي الفرشاه عشان تتأكدين من التغطيه،،،
أما إذا كان هدفج مجرد اضاءه وتفتيح لمنطقة تحت العين فـ الاصبع يفي بالغرض،،،
~~~~~~~~
ايش طريقة وضع الكونسيلر لتحت العين ولإخفاء آثار الحبوب والخ ؟؟؟
الطريقه المفضله عند خبراء التجميل هي (الطبطبه) tapping يعني مو التدليك ولا المسح،،،
لا ،،، بعد ما ترطبين المنطقه بالكريم المناسب ،،، تحطين على اصبعج او الفرشاه شوية كونسيلر وتطبطبين فيه على المنطقه وتتركينه شوي لحد ما البشره تمتصه شوي ،،،
بعدها ندمج الأطراف (مو دمج كثر ماهو تمويه) عشان يبين طبيعي !
بعدها ينحط شوية بودره لوس للتثبيت (و اكرر شوية بودره عشان ما تعطيج منظر تجاعيد)
~~~~~~~~~~~
ماهو الفرق بين الكونسيلر المخصص للهالات السوداء ،،، والمخصص لآثار الحبوب؟؟؟
يقولون
خبراء التجميل إن كونسيلر الهالات السوداء يكون كريمي وسائل أكثر،، ويفضل
انه يحتوي في مكوناته على silk proteins اللي تسمح بإنه يبقى لفتره طويله
وما يتكتل في خطوط العين ،،، وإنه يحتوي على فيتامين E ،،،
وان المخصص للحبوب يفضل انه يكون اسمك وذا ملمس مخملي ،،،
~~~~~~~
ماهي النتيجه اللي أبحث عنها في كونسيلري لمنطقة تحت العين؟؟؟
هذا شي حده مهم بنات ،،، الهدف الأول من الكونسيلر هو توحيد اللون (مو الاضاءه) ،،،
أهم شي يتوحد لون الهالات السوداء مع باقي الوجه ،،،
بعدها لو حبيتي تضيفين إضاءه مو مشكله ممكن ،،، بس مو قبل توحيد اللون ،،،
وهذي المشكله اللي كلنا نطيح فيها ،،، نستعجل عالإضاءه وننسى ان السواد يبين أكثر وأكثر لو ما وحدنا اللون أول ،،،
خلونا نشوف بعض الكونسيلرات المميزه في السوق وإستخداماتها المختلفه
أول شي من ماركة estee lauder
كونسيلر كريمي
يحتوي على درجتين من اللون ،،، وحده فاتحه لمنطقة تحت العين،،،
ووحده أغمق شوي لباقي الوجه ،،،
وممكن ندمج اللونين مع بعض
مستحضر للإضاءه ،،،
ينفع للي ما عندهم هالات ويبون شوية إضاءه سواء تحت العين أو أي منطقة بالوجه ،،،
أما اللي يعانون من الهالات فلازم يستخدمون شي يخفي الهالات قبل هالمستحضر !
هذا كونسلير حده حلو (أنصحكم طال عمري فيه)
ينفع لتحت العين وللويه عامة ،،،
ماركة بينيفت
هذا يعتبر كوريكتر وبرايمر أكثر منه كونسيلر (شرحنا الفرق فوق)
وأكثر ناس يحتاجون له اللي عندهم مناطق حمرا ،،،
ينفع لكل شي
هالعلبه تحتوي على عدة درجات من الكونسيلر مع مستحضرات إضاءه،،،
يستخدم غالبا لإزالة الإحمرار
(شفتو شكثر مهتمين بالاحمرار مع اننا كخليجيات قليل ما نعاني منه)
هالبودره هم للإحمرار
لتفتيح ما تحت العين وللوجه
(يعني لما نترجمها حسب ما فهمنا ببداية الموضوع انه يفتح = ما يصلح لحاله لازم توحيد لون تحته والا بتطلع النتيجه رماديه)
إضاءه ما تنفع لحالها لازم توحيد لون قبلها
ماركة YSL
الصراحه احب هالمستحضر ،،،
هو صج تغطيته مو شي بس فيه أيام ما أحتاج تغطيه وأحيانا استخدمه فوق كونسيلر ثاني
يعطي مظهر طبيعي وندي للبشره
ممكن نستخدمه على كل الوجه ،،،
هذا مخصص للهالات السوداء وتغطيته أقوى
ماركة chanel
لاحظوا إسمه مصحح مو بس كونسيلر ،،،
ينفع للهالات وللبشره ،،،
وحتى درجات الألوان قويه (بنتكلم عنها بعد شوي)
مخصص لتحت العين
ماركة stilla
إضاءه
وصلنا للمفاجأه
فيه نظرية يسمونها عجلة الألوان
ومغزاها إن اللون يقضي على اللون اللي يقابله ،،،
الصراحه أنا مو خبيره وما اقدر اتفلسف عليكم بشي مو فاهمته عدل،،،
بس اللي فهمته ان مثلا الهالات السوداء المستعصيه غالبا لونها يميل يا للأزرق ياللبنفسجي ،،،
وإنه عشان نقضي عليهم نستخدم لون مايل للمشمشي أو البرتقالي،،،
البنت تقول انها عشان تخفي هالاتها السودا تستخدم لون برتقالي !!!!!
غريبه صح؟؟
بالبدايه نرطب العين بكريم مناسب،،،
بعدها اهي ما كان عندها كونسيلر بلون برتقالي ،،، عادي حطت روج
تحط الروج بدقه عالأماكن الغامجه وتحاول أبد أبد ما تطلع
تموه اللون شوي شوي
بعدها تستخدم كونسيلر عادي من اللي قلنا عنهم واهي استخدمت هالنوع من ماك
وهذي هي بعد ما حطت الكونسيلر العادي
بتلاحظون الهالات السودا اختفت كليا،،،
إذا الزبده اننا ندور لون مصحح او كونسيلر بلون مشمشي او برتقالي ونحطه قبل الكونسيلر العادي وقبل الإضاءه وقبل كل شي ،،،
وفيه ماركات قدمت هاللون مثل بوبي براون
مشهور عند بوبي براون الكونسيلر وكثير ناس ارتاحوا عليه،،،
لكن اللي الغالبيه ما يعرفونه ان بوبي براون عندهم مصحح وعندهم كونسيلر ،،،
المصحح بنلاقي منه لون مشمشي
وهذا الكونسيلر العادي قلت يمكن تبون تشوفونه
أيضا ماركة ميك اب فور ايفير قدمت لون برتقالي مشمشي بس موجود بالset اللي كلنا نعرفها
الثلاثاء يونيو 28, 2011 5:43 pm من طرف AMANY
» كيفيه العنايه بالشفاه
الجمعة يونيو 24, 2011 9:32 pm من طرف همس المشاعر
» كيف تزرع الثقة في طفلك
الجمعة يونيو 24, 2011 9:05 pm من طرف همس المشاعر
» قصيدة الحزن لنزار قبانى
الجمعة يونيو 24, 2011 9:03 pm من طرف همس المشاعر
» قصيدة اغضب لنزار قبانى
الجمعة يونيو 24, 2011 9:02 pm من طرف همس المشاعر
» غرف نوم اطفال جميلة
الجمعة يونيو 24, 2011 9:00 pm من طرف همس المشاعر
» حصريا فيلم 365 يوم سعاده dvd
الجمعة يونيو 24, 2011 4:29 pm من طرف Mady
» بسكويت جوز الهند
الجمعة يونيو 24, 2011 4:28 pm من طرف Mady
» أشياء يفقدها الرجل بعد الزواج .. كيف تساعدينه؟
الخميس يونيو 23, 2011 11:19 pm من طرف همس المشاعر